పరవాడ ఫార్మాసిటీలో అగ్నిప్రమాదం.. స్పందించిన మంత్రి లోకేశ్

అనకాపల్లి జిల్లా పరవాడలోని జవహర్‌లాల్ నెహ్రూ ఫార్మాసిటీలో మంగళవారం తెల్లవారుజామున ఘోర అగ్నిప్రమాదం సంభవించింది. దక్షిణ్‌ ఎనర్జీ పరిశ్రమలో చోటుచేసుకున్న ఈ దుర్ఘటనలో ఇద్దరు కార్మికులు సజీవ దహనమవగా, మరో ఇద్దరు తీవ్రంగా గాయపడ్డారు.

ఈ ప్రమాదంపై మంత్రి నారా లోకేశ్ ఎక్స్ వేదికగా తీవ్ర దిగ్భ్రాంతి వ్యక్తం చేశారు. కార్మికుల మరణం అత్యంత విషాదకరమని పేర్కొన్నారు. మృతుల కుటుంబాలకు తన ప్రగాఢ సానుభూతిని తెలియజేశారు. "గాయపడిన వారికి మెరుగైన వైద్య చికిత్స అందించేందుకు ప్రభుత్వం చర్యలు తీసుకుంటోంది. క్షతగాత్రులు త్వరగా కోలుకోవాలని ప్రార్థిస్తున్నాను. బాధిత కుటుంబాలకు కూటమి ప్రభుత్వం అన్ని విధాలా అండగా నిలుస్తుంది" అని లోకేశ్ హామీ ఇచ్చారు.

ఈ ఘటనపై బీజేపీ రాష్ట్ర అధ్యక్షుడు పీవీఎన్ మాధవ్, పెందుర్తి ఎమ్మెల్యే పంచకర్ల రమేశ్ బాబు కూడా విచారం వ్యక్తం చేశారు. పారిశ్రామిక ప్రాంతాల్లో కఠినమైన భద్రతా ప్రమాణాలు పాటించాల్సిన అవసరాన్ని మాధవ్ నొక్కిచెప్పారు. అధికారులు సహాయక చర్యలు చేపట్టారని, ప్రమాదంపై పూర్తిస్థాయిలో విచారణ జరుగుతోందని రమేశ్ బాబు తెలిపారు.

కాగా, ఈ ప్రమాదంపై ముఖ్యమంత్రి చంద్రబాబు, ఉప ముఖ్యమంత్రి పవన్ కల్యాణ్ కూడా ఇప్పటికే స్పందించి, మృతుల కుటుంబాలకు తమ సంతాపం ప్రకటించారు. ప్రమాదానికి గల కచ్చితమైన కారణాలపై అధికారులు దర్యాప్తు చేస్తున్నారు.